Source: Maharashtra Times - http://maharashtratimes.indiatimes.com/articleshow/9156711.cms

कल्याण-डोंबिवलीतील रस्त्यांची अक्षरश: चाळण झाल्याबद्दल पालिकेच्या तीन वरिष्ठ अधिकाऱ्यांना कारणे दाखवा नोटीस बजावली असली आणि निकृष्ट रस्त्यांबद्दल आयुक्त व महापौरांवर जनतेची जाहीर माफी मागण्याची वेळ ओढवली असली तरी, याच रस्त्यांचे पालिकेने 'उत्कृष्ट' काम केल्याचा 'साक्षात्कार' होऊन अखिल भारतीय स्थानिक स्वराज्य संस्थेने पालिकेचा 'नगररत्न पुरस्कार' देऊन शुक्रवारी गौरव केला! वाहन चालवणे सोडाच, धड चालता येईल इतक्याही लायकीचेही रस्ते शहरांत नसताना केडीएमसीने हा पुरस्कार कसा पटकावला, याबद्दल कल्याण-डोंबिवलीकर आश्चर्य व्यक्त करत आहेत.

कल्याण डोंबिवली महापालिका हद्दीत ३३५ किलोमीटर लांबीचे रस्ते आहेत. त्यापैकी ९० किमी रस्ते भुयारी गटार योजनेसाठी तर, ८० किमी रस्ते पाणीपुरवठा योजनेसाठी खोदण्यात आले. गेल्या २ वर्षांपासून सुरू असलेल्या या कामांमुळे रस्त्यांची पुरती दुरवस्था झाली आहे. एरवी निवडणुकीत विकासकामे हा प्रचाराचा मुद्दा होत नसला तरी मागील वषीर् झालेल्या केडीएमसीच्या निवडणुकीत खड्ड्यांमध्ये हरवलेल्या रस्त्यांचा मुद्द्यांभोवती प्रचार राहिला.

निवडणुकीनंतरही येथील रस्त्यांची स्थिती पालटली नसून ३१ मे आधी रस्ते सुस्थितीत आणण्याचे आश्वासन आयुक्त रामनाथ सोनवणे यांनी दिले होते. ही डेडलाइन पाळणे प्रशासनाला शक्य झाले नाही व त्याबद्दल आयुक्त रामनाथ सोनवणे व महापौर वैजयंती गुजर यांच्यावर महासभेत जनतेची जाहीर माफी मागण्याची नामुष्की ओढवली. पावसाळ्यात रस्तेदुरुस्ती शक्य नसल्याने आता ती बंद असून ऑक्टोबरनंतरच या कामांना पुन्हा सुरुवात होऊ शकेल. याचा अर्थ पावसाळ्यात खड्डेमय रस्त्यांतूनच रहिवाशांना वाट काढावी लागणार आहे.

खड्ड्यांवरून प्रशासन सतत टीकेचे धनी झाल्याने पावसाळा तोंडावर येउन ठेपला असताना काही ठिकाणी वेगाने रस्तेदुरुस्ती सुरू झाली. मात्र आत्ताच डांबरीकरण झालेल्या डोंबिवलीतील दीनदयाळ रोड, टंडन रोड, नवापाडा येथील रस्त्यांना पुन्हा खड्डे पडू लागले आहेत. कल्याणात मुरबाड रोडसारख्या मुख्य रस्त्याचे सिंडिकेट परिसरात अतिशय अरुंद स्वरुपात डांबरीकरण करण्यात आले. नॅशनल हायवे सारखा रस्ता बिर्ला कॉलेज परिसरात केविलवाण्या स्थितीत आहे. रस्त्यांची कामे निकृष्ट होत असल्याच्या तक्रारी पालिका आयुक्त रामनाथ सोनवणे यांच्याकडेही आल्या असून त्यांनी एक्झिक्युटीव्ह इंजिनीअर चंदकांत कोलते, प्रमोद कुलकणीर् व हायड्रॉलिक इंजिनीअर अशोक बैले यांना कारणे दाखवा नोटीस बजावली. या पार्श्वभूमीवर पालिका क्षेत्रातील रस्त्यांबद्दल मिळालेल्या पुरस्काराने सर्वांच्याच भिवया उंचावल्या आहेत